UNHCR: Shkupi të kujdeset më shumë për refugjatët aziatikë

Agjencinë për refugjatë të OKB-së (UNHCR) ka apeluar tek autoritetet maqedonase që t’i trajtojë më mirë emigrantët sirianë dhe afganë gjatë lëvizjes në këtë shtet

Vdekjet aksidentale të disa refugjatëve afganë dhe sirianë në hekurudhat e Maqedonisë ka shqetësuar edhe Agjencinë për refugjatë të OKB-së (UNHCR), e cila ka kërkuar nga Qeveria e Maqedonisë që të shtojë kujdesin për fatin e këtyre refugjatëve të ikur nga lufta.

Ky shqetësim dhe rekomandim i UNHCR-së ka ardhur pasi që brenda një periudhe të shkurtër janë regjistruar shtatë viktima që kanë humbur jetën në këto fatkeqësi.

“UNHCR shpreh dhimbjen e thellë për fatkeqësinë e fundit fatale, kur dy vëllezër emigrant sirian humbën jetën në afërsi të Velesit, pasi që u përplasën paprimtas nga një tren mallrash”, citon INA një komunikatë të UNHCR-së.

Shumica e emigrantëve e shfrytëzojnë hekurudhën si destinacion për lëvizjen e tyre nga pjesa jugore e vendit – Greqia deri në pjesën veriore në veri me Serbinë. Kjo rrugë hekurudhore është edhe pjesë e Korridorit Dhjetë (10).

UNHCR i ka bërë thirrje qeverisë që të vazhdojë të përmirësojë zgjidhjen e fatit të këtyre emigrantëve përmes statusit të azilit apo edhe forma tjera për të shmangur këto rrugë të rrezikshme për jetën. UNHCR ka shprehur gatishmëri edhe për të ndihmuar në këtë drejtim.

Ndryshe edhe në Serbi, një refugjat sirian e ka humbur njërën këmbë në hekurudhat e Preshevës.