UBS fillon migrimin e klientëve zviceranë të Credit Suisse

(KEYSTONE/Ennio Leanza)

Dy vjet pas blerjes së gjigantit bankar Credit Suisse, UBS ka nisur një fazë historike të bashkimit të dy institucioneve: migrimin e llogarive të klientëve zviceranë. Pas testimeve paraprake në Azi, transfertat e para tashmë kanë filluar në Zvicër, duke shënuar një hap vendimtar në integrimin e dy bankave, shkruan RTS, transmeton albinfo.ch.

Françesko Vadala, një punonjës afatgjatë i Credit Suisse, ishte ndër klientët e parë që përjetoi këtë kalim. Gjatë një fundjave në mes të qershorit, llogaria e tij u transferua në UBS pa ndërhyrje nga ana e tij. Megjithatë, edhe pse procesi kaloi pa probleme teknike, ai pranon se kishte dyshime dhe pasiguri për sigurinë e fondeve dhe aksesin në dokumentet e mëparshme të e-banking. “Na lindën pyetje teknike – a do të jenë paratë në llogari të hënën? A do të kenë dokumentet e vjetra ende qasje?”, shprehet ai. Por komunikimi i rregullt nga banka në muajt janar, mars dhe qershor ndihmoi në qetësimin e klientëve.

Ndërkohë, migrimi po ndodh në mënyrë të pjesshme. Nëna e Franceskos, për shembull, sapo ka marrë një letër që e njofton për transferimin e ardhshëm të llogarisë së saj.

UBS shprehet e kënaqur me ecurinë e fazës së parë. “Në tremujorin e dytë të vitit 2025, kemi migruar me sukses një valë të parë të rëndësishme marrëdhëniesh me klientët në Zvicër”, thuhet në një deklaratë të bankës. Objektivi i saj është që migrimi të përfundojë plotësisht deri në fund të tremujorit të parë të vitit 2026, transmeton albinfo.ch.

Por një operacion i këtij përmasash, që përfshin mbi 1.3 milion klientë, nuk është pa rreziqe. Avokati Henri Corboz, ekspert i ligjit bankar, paralajmëron se mashtruesit mund të përpiqen të përfitojnë nga kjo periudhë e ndjeshme duke u paraqitur si përfaqësues të UBS për të mashtruar klientët. “Ka një rrezik real që klientët të kontaktohen nga mashtrues me pretekstin e ndihmës për migrimin”, thotë ai.

Gjithashtu, Corboz thekson rrezikun e mundshëm të humbjes së të dhënave dhe sfidën e ruajtjes së reputacionit të UBS dhe të të gjithë qendrës financiare zvicerane. “Ky nuk është një kalim i zakonshëm teknik. Është një operacion i ndërlikuar që ndikon në të gjithë industrinë financiare të vendit”, vëren ai.

Ndërsa në të kaluarën ka pasur bashkime bankash në Zvicër, ekspertët e konsiderojnë këtë si një prej më të ndërlikuarve për shkak të kompleksitetit dhe gamës së shërbimeve që ofronte Credit Suisse. Për UBS, kjo është një provë e madhe që do të ndikojë jo vetëm në pozicionin e saj, por edhe në besimin e përgjithshëm ndaj sektorit bankar zviceran, transmeton albinfo.ch.