UBS drejt një tjetër vale shkurtimesh

(KEYSTONE/Ennio Leanza)

Pas dy vitesh kursimesh masive të kostove, banka gjigande UBS nuk e ka ende arritur objektivin e saj financiar dhe pritet të shkurtojë mijëra vende pune në muajt në vijim. Sipas të dhënave të publikuara në raportet tremujore të bankës, që nga blerja e Credit Suisse në vitin 2023, UBS ka reduktuar rreth 20,000 pozicione pune me kohë të plotë, shkruan Blick, transmeton albinfo.ch.

Në fund të marsit 2025, UBS raportoi gjithsej 106,789 punonjës me kohë të plotë dhe 19,287 kontraktorë – duke arritur një total prej 126,076 vende pune. Në krahasim me verën e vitit 2023, kur banka kombinonte 119,100 pozicione të brendshme, rënia është e dukshme dhe sinjalizon një prirje që mund të vazhdojë.

Procesi i zvogëlimit nuk ka ende një fund të qartë. Ai pritet të zgjasë të paktën deri në mesin e vitit 2026, kur të përfundojë transferimi i plotë i klientëve dhe mbyllja e sistemeve të Credit Suisse. Vetëm atëherë pritet të përcaktohet saktë edhe numri përfundimtar i punonjësve të nevojshëm.

Drejtori ekzekutiv i UBS, Sergio Ermotti, ka deklaruar një objektiv për të kursyer 13 miliardë dollarë në total. Deri tani, banka ka arritur të realizojë rreth 8.5 miliardë dollarë – ose dy të tretat e synimit. Me 4.5 miliardë dollarë ende për të kursyer, vlerësohet se mund të zhduken deri në 10,000 vende pune të tjera, transmeton albinfo.ch.

Në Zvicër, numri prej 3,000 shkurtimesh është diskutuar që nga fillimi i procesit, por burime të brendshme pretendojnë se kjo shifër është nënvlerësuar. Thuhet se punonjësit po përballen me një “presion të butë” për t’u larguar vullnetarisht, me disa profile profesionale – sidomos ata me sfond në Shkencat Civile – që janë më të prekur.

Për të lehtësuar pasojat, UBS ka ofruar një plan social ndër më bujarët në Zvicër, përfshirë paga deri në 12 muaj dhe 12,000 CHF shtesë për trajnime profesionale. Banka po përpiqet gjithashtu të riemërojë punonjës në pozicione të tjera të brendshme – dy të tretat e emërimeve të reja janë bërë brenda institucionit, sipas një deklarate të fundit të Ermottit, transmeton albinfo.ch.