U hap Salloni i 81-të i veturave në Gjenevë

Asnjëherë deri më tash nuk ka pasur kaq shumë kërkesa për hapësira të ekspozimit sikur këtë vit

Është hapur sot në Gjenevë Panairi i 81-të me radhë i automobilëve. Gjatë kohës sa do të qëndrojë i hapur, deri më 13 mars, automobilët e tyre do t`i prezantojnë 260 ekspozues nga 31 vende të botës.

Drejtori gjeneral i sallonit, Rolf Studer ka thënë për radion DRS se kërkesa për hapësirë ekspozimi ka qenë shuzmë e madhe. „Asnjëherë deri më tash nuk kemi pasur kaq shumë kërkesa për hapësira të ekspozimit” ka thënë ai.

Studer po ashtu ka theksuar se në trend janë veturat e vogla dhe të lehta. Po ashtu një vend të rëndësishëm në panair zënë edhe automobilët alternativë dhe ata që funksionojnë me energji elektrike.

Në një fjalim që ka mbajtur me rastin e hapjes, presidentja e vendit, Micheline Calmy-Rey është shprehur e kënaqur për vendin që zënë automobilët alternativë në këtë panair.