Trump: Marrëveshja direkte e paqes në Ukrainë, më e përshtatshme sesa armëpushimi

(AP Photo/Julia Demaree Nikhinson)

Presidenti amerikan, Donald Trump, është shprehur të shtunën, pak pas takimit të tij me presidentin rus, Vladimir Putin, dhe bisedës telefonike me liderët e NATO-s, përfshirë edhe presidentin ukrainas, Volodymyr Zelensky, se “mënyra më e mirë për t’i dhënë fund luftës së tmerrshme mes Rusisë dhe Ukrainës është që të shkohet menjëherë drejt marrëveshjes së paqes”.

Përmes një shkrimi në platformën “Truth Social”, Trump ka thënë se kjo do t’i jepte fund luftës dhe do të ishte më thelbësore sesa “marrëveshja për armëpushim”.

Ai ka shtuar ndër të tjera se “ka pasur një ditë të shkëlqyeshme dhe tepër të suksesshme në Alaskë”.

Krahas kësaj, Trump ka konfirmuar po ashtu takimin me Zelenskyn, i cili do të udhëtojë të hënën për në Washington DC, ka shkruar BBC, përcjell albinfo.ch.

“Nëse gjithçka funksionon si duhet, atëherë do të planifikojmë një takim me presidentin Putin. Potencialisht, miliona jetë njerëzish mund të shpëtohen”, ka deklaruar Trump.