Trump, ish-presidenti i parë amerikan që akuzohet në gjykatë federale

(AP Photo/Alex Brandon)

Donald Trump është akuzuar për mbajtjen e dokumenteve të klasifikuara në pronën e tij në Florida pas largimit nga detyra. Zhvillimi i jashtëzakonshëm e bën atë ish-presidentin e parë në historinë amerikane që përballet me akuza penale nga qeveria federale. Aktakuza mbart pasoja të rënda ligjore, duke përfshirë mundësinë e burgimit nëse ai dënohet. Por ajo mbart gjithashtu implikime të mëdha politike, duke ndryshuar potencialisht zgjedhjet presidenciale mes kandidatëve republikanë, ku Donald Trumpi deri tani vazhdon të jetë kandidati kryesor.Një juri e madhe federale në shtetin jugor të Floridas paditi ish-presidentin Donald Trump të enjten për mbajtjen e dokumenteve të klasifikuara pas largimit nga Shtëpia e Bardhë.Departamenti i Drejtësisë informoi avokatët e Trump-it për aktakuzën dhe ish presidenti e konfirmoi atë në platformën e tij të mediave sociale.

“Ndjej shumë trishtim që jemi një komb në rënie dhe megjithatë ata shkojnë pas një presidenti popullor, një presidenti që mori më shumë vota se çdo president në historinë e vendit tonë, me rezultate më të mira herën e dytë në zgjedhje sesa herën e parë. Ata po më ndjekin me një tjetër mashtrim, për materialet e klasifikuara, njëlloj si me mashtrimin ‘Rusia, Rusia, Rusia’. Ka shtatë vjet që më ndjekin. Ata nuk mund të ndalen dhe kjo është ndërhyrje në zgjedhje në nivelin më të lartë. Asnjëherë nuk ka ndodhur diçka si kjo më parë. Unë jam një njeri i pafajshëm. Unë jam një person i pafajshëm”, tha ish presidenti.

Avokati i zotit Trump, James Trusty i tha rrjetit CNN se akuzat përfshijnë mbajtje të qëllimshme të informacionit të mbrojtjes kombëtare, pengim të drejtësisë, deklarata të rreme dhe konspiracion.

Ish-presidenti thotë se ai pritet të paraqitet në gjykatën federale në Majami të martën pasdite. Një person i njohur me këtë çështje i tha agjencisë AP se padia përmban 7 akuza.

Trumpi bëhet kështu ish-presidenti i parë amerikan që akuzohet në gjykatë federale./VOA