Presidenti i SHBA-së, Donald Trump, ka deklaruar se do të marrë një vendim përfundimtar brenda dy javësh lidhur me një mundësi për ndërhyrje ushtarake ndaj Iranit.

Duke folur përmes një deklarate të lexuar nga zëdhënësja e Shtëpisë së Bardhë, Karoline Leavitt, Trump tha se do t’i japë hapësirë përpjekjeve diplomatike para se të vendoset për përfshirjen e SHBA-së në konfliktin që po përshkallëzohet në Lindjen e Mesme.

“Duke pasur parasysh mundësinë reale të negociatave me Iranin në të ardhmen e afërt, do të vendos nëse do të veprojmë ushtarakisht apo jo, brenda dy javëve,” thuhet në deklaratë.

Këto komente vijnë në një kohë kur Irani ka filluar të godasë Izraelin, pas sulmeve të fundit izraelite ndaj bazave ushtarake dhe bërthamore iraniane. Burime të afërta me administratën amerikane kanë treguar se Trump është i prirur të mbështesë një përfshirje të SHBA-së në konflikt, nëse negociatat nuk japin rezultat.