TRIAL kundër mosndëshkimit të kriminelëve ballkanikë të luftës

TRIAL ka filluar një projekt në rajonin e Ballkanit që ka për qëllim mbledhjen e informacionit mbi autorë të dyshuar të cilët kanë lëvizur në vende të tjera ku ata po përfitojnë nga mosndëshkimi

Shoqata zvicerane kundër mosndëshkimit TRIAL (gjykimi) prej 10 vitesh lufton mosndëshkimin e autorëve të krimeve të luftës, kundër njerëzimit dhe gjenocidit. Në këtë drejtim, kjo shoqatë  ndërmerr aktivitete të ndryshme, përfshirë këtu edhe denoncimin e rasteve te autoritetet e vendeve që mund të ushtrojnë juridiksion “universal” për të hetuar dhe ndjekur penalisht kriminelët e dyshuar të luftës që banojnë në territorin e tyre.

Siç shkruan TRIAL në një komunikatë të saj për shtyp, deri më sot, vende të shumta, duke përfshirë edhe Belgjikën, Kanadanë, Francën, Gjermaninë, Spanjën, Zvicrën, Britaninë e Madhe dhe vendet skandinave kanë hetuar, gjykuar dhe dënuar me sukses shkelësit të cilët kanë provuar t`i shpëtojnë drejtësisë duke ikur nga vendet e tyre të prejardhjes.

Duke u përpjekur të luajë rolin që i ka vënë vetes, për të ndihmuar viktimat që të fitojnë të drejtën e tyre, pastaj duke promovuar rëndësinë e gjykimeve të drejta dhe sundimin e ligjit dhe besimit në barazinë e të gjitha viktimave, pavarësisht nga përkatësia e tyre etnike apo shtetërore, TRIAL ka filluar një projekt në rajonin e Ballkanit. Projekti ka për qëllim mbledhjen e informacionit mbi autorë të dyshuar të cilët kanë lëvizur në vende të tjera ku ata po përfitojnë nga mosndëshkimi.

TRIAL përmes këtij projekti do të përpiqet për të mbledhur dhe analizuar informata nga viktimat, viktimat, dëshmitarët, shoqatat dhe burime të tjera të besueshme dhe të përpilojë dosjet në lidhje me autorët e dyshuar, me qëllim dërgimin e tyre tek autoritetet kompetente për hetime të mëtejshme dhe në prokurori, thuhet në komunikatën për medie të shoqatës zvicerane kundër mosndëshkimit TRIAL (gjykimi)

Personi kontaktues: [email protected] ose 387 66 830 467.