Trashëgimtarja e Skënderbeut vjen në Rahovec

Sophie Castriota është brezi i 14-të i heroit tonë kombëtar, Gjergj Kastrioti - Skënderbeu

Sophie Castriota do të vijë në Kosovë, përkatësisht në Rahovec. Çdo vjet, qyteti i vjetër i Rahovecit i cili njihet më shumë për kultivimin e rrushit dhe prodhimin e produkteve nga rrushi, organizon festën e vjeljes së rrushit në fillim të shtatorit, shkruan albinfo.ch.

Kjo festë quhet “HardhFest” dhe do të mbahet në Rahovec më 2, 3 dhe 4 shtator, ku do të ketë mysafirë të ndryshëm dhe do të ketë shumë argëtim gjatë festës.

Organizatorët e “HardhFest 2016”, ndër të tjera, njoftojnë përmes një postimi në “Facebook”, se mysafire speciale do të jetë pinjollja (trashëgimtarja) e heroit të kombit Gjergj Kastrioti – Skënderbeu, Sophie Castriota.

Pjesëmarrjen e saj në “HardhFest 2016” e konfirmoi vetë përmes një videoje. “Përshëndetje të gjithëve. Do të marr pjesë në këtë festë. Ju ftoj të gjithëve që të jeni aty”, ka thënë ndër të tjera Castriota.

Sophie Castriota është brezi i 14-të i heroit tonë kombëtar, Gjergj Kastrioti – Skënderbeu. Ajo ka lindur në Itali, derisa tani jeton në Brisbane të Australisë, kurse studion në Queensland për Akademi të Muzikës, por përkohësisht ka ndërprerë studimet për t’iu përkushtuar më shumë aktrimit dhe muzikës.