Transporti ujor i Liqenit të Gjenevës ka nevojë për mbi 500 milionë franga

(KEYSTONE/Salvatore Di Nolfi)

Kompania zvicerane e transportit ujor Compagnie Générale de Navigation (CGN) po përballet me një krizë serioze infrastrukturore dhe financiare. Në një intervistë për programin informativ “19h30” në RTS, drejtori i përgjithshëm Vincent Pellissier deklaroi se CGN ka nevojë për një injeksion financiar urgjent prej më shumë se 600 milionë frangash zvicerane për të garantuar funksionimin dhe të ardhmen e saj, transmeton albinfo.ch.

“Na duhen 150 milionë franga për kantierin detar, 150 milionë për restaurimin e anijeve ‘Belle Epoque’ dhe mes 200 deri në 300 milionë franga për zgjerimin e transportit publik,” u shpreh Pellissier.

Nga tetë anijet me avull që përbëjnë pjesën më ikonike të flotës së CGN-së, gjashtë nuk janë më të përshtatshme për lundrim. Anija “La Suisse” është aktualisht e ankoruar për shkak të dëmtimeve teknike, çka ka rezultuar në 3.000 anulime udhëtimesh dhe pakënaqësi të theksuar nga publiku. Në vitin e kaluar, një incident me anijen “Simplon” në portin e Cully (Vaud) shkaktoi ndërprerje të mëdha dhe reagime negative.

Plani i shpëtimit do t’u paraqitet aksionarëve deri në fund të këtij viti, mes të cilëve janë kantonet Gjenevë, Vaud dhe Valais, që zotërojnë bashkërisht 57% të kompanisë. Ndihma financiare pritet të kërkojë mbështetje të koordinuar publike, përfshirë subvencione nga autoritetet kantonale dhe federale.

CGN është një element kyç i transportit në liqenin Léman, jo vetëm për udhëtarët e përditshëm, por edhe për turizmin historik dhe kulturor në rajon. Nëse nuk ndërmerren masa urgjente, e ardhmja e flotës dhe funksionaliteti i saj janë në rrezik serioz, transmeton albinfo.ch.