Tragjedi në Mesdhe, përmbyset anija me 700 persona

Mjeti lundrues është përmbysur rreth 100 kilometra në veri të Libisë, ndërsa pas intervenimit të shpejt të një anije portugeze, disa persona janë shpëtuar

Një anije me rreth 700 klandestinë në bord është fundosur në Kanalin e Siçilisë në Detin Mesdhe. Ansa njofton se mjeti lundrues është përmbysur rreth 100 kilometra në veri të Libisë, ndërsa pas intervenimit të shpejt të një anije portugeze, 28 persona janë shpëtuar.

Sipas informacioneve të para, mbrëmjen e së shtunës peshkarexhja kishte kërkuar ndihmë te Roja Bregdetare italiane, pasi mjeti kishte vështirësi në lundrim. Salla operative ka dërguar për ndihmë një anije tregtare portugeze, raporton TCH.

Mendohet se në momentin që e kanë parë anijen, klandestinët kanë shkuar të gjithë në njërën anë të peshkarexhës duke e përmbysur atë. Ndërkohë, ka nisur një operacion shpëtimi në Kanalin e Siçilisë, i koordinuar nga Roja Bregdetare italiane, ku marrin pjesë njësi ajrore dhe detare.

Deri më tani nga deti janë nxjerrë 21 trupa të pajetë, ndërsa nuk dihet fati i 672 emigrantëve të tjerë.