Thurgau ua shton edhe një kusht atyre që duan pasaportën zvicerane

Ndryshe nga kantonet tjera që e kërkojnë njohjen e gjuhës së vendit (në të folur) në nivelin B1, Thurgau e ka vendosur nivelin B2

Procedura e natyralizimit të të huajve në Zvicër ose (fitimi i pasaportës) konsiderohet si një ndër më të ashprat në Evropë dhe ajo do të ashpërsohet edhe më shumë nga një janari i vitit të ardhshëm. Por, për Kantonin Thurgau, kjo procedurë ishte ende e butë, kështu që, me iniciativën e SVP-së, parlamenti i këtij kantoni ka vendosur në seancën e tij të djeshme edhe për një ashpërsim shtesë.

Kush e dëshiron pasaportën zvicerane në këtë kanton nga 1 janari 2018 duhet të plotësojë një kusht që nuk e parashikon ligji federal për natyralizim, shkruan sda.ch. Ndryshe nga kantonet tjera që e kërkojnë njohjen e gjuhës së vendit (në të folur) në nivelin B1, Thurgau e ka vendosur nivelin B2. Për këtë ndryshim ka votuar sot Parlamenti i Kantonit, ndonëse me një epërsi mjaft të ngushtë, 58 pro dhe 57 kundër.

Ndryshimi ende nuk është i plotfuqishëm pasi që nevojitet edhe një votim përmbyllës, i cili do të bëhet në një nga mbledhjet e ardhshme, tranmseton albinfo.ch. Por, se ligji për natyralizimin në këtë kanton do të jetë më rigoroz se në kantonet tjera, duket se është tashmë punë e kryer. Qeveria e Kantonit është zotuar se do ta jetësojë kërkesën e SVP-së për caktimin e Nivelit B2 si kusht për natyralizim. Këtë e ka premtuar anëtarja e ekzekutivit të kantonit, Cornelia Komposh nga SP.

Kundër ashpërsimit kanë qenë deputetët nga SP, CVP, të Gjelbrit dhe Liberalët e Gjelbër (GLP). Sipas këtyre, niveli B1 është plotësisht i mjaftueshëm për t`u shprehur lidhur çështjet që kanë të bëjnë me punën dhe përditshmërinë. Ndërsa kërkesa për nivelin B2 është vetëm maltretim i panevojshëm, përcjell albinfo.ch. Madje, siç ka theksuar një deputet i CVP-së edhe vetë zviceranët do ta kishin vështirë të kalonin një provim të tillë.

Në komisionin përgatitor, SVP-ja kishte kërkuar edhe ashpërsime të tjera por kishte dështuar të fitonte shumicë. Njëra ndër kërkesat ka qenë që punëdhënësit përmes një liste të vërtetojnë se personi që ka vendosur të natyralizohet është i integruar mirë.