Thjeshtëzohen procedurat për të bërë biznes

Autoritetet kosovare po vazhdojnë me thjeshtëzimin e procedurave për të bërë biznes

Të premten është nënshkruar në Prishtinë edhe një memorandum bashkëpunimi, i cili ka për qëllim krijimin e lehtësirave sa më të mëdha për bërje biznes në Kosovë.

Një memorandum të tillë e kanë nënskruar zyrtarë të Administratës Tatimore të Kosovës (ATK) dhe zyrtarëve të Agjencionit për Regjistrimin e Bizneseve në Kosovë (ARBK).

Ky memorandum precizon procedurat dhe punët që duhet të kryhen nga të dyja agjencionet në këtë fazë të lehtësirave për bërje biznes në Kosovë.

“Me këtë hap, prej javës së ardhshme Administrata Tatimore, Agjencioni për Regjistrimin e Bizneseve dhe Doganat do t’i trajtojnë më shpejtë, më lehtë, edhe me një shkurtim të kohës, edhe kosto më të ulët të gjithë pronarët e bizneseve që regjistrojnë dhe planifikojnë të zhvillojnë aktivitet biznesi, përmes procesit të sinkronizimit dhe harmonizimit të procedurave, lehtësimit në një aplikacion të vetëm“, ka thënë drejtori i Administratës Tatimore të Kosovës (ATK), Behxhet Haliti.

Tash e tutje në një qendër të regjistrimit, në një komunë të Kosovës tatimpaguesi apo qytetari që planifikon të hapë një biznes do t’i ketë të gjitha shërbimet në një vend, ndërsa sistemet do të integrohen në të tri institucione që do të komunikojnë në mes veti në mënyrë automatike dhe e lehtësojnë të gjithë këtë proces, është thënë gjatë nënshkrimit të memorandumit në Prishtinë.

Procedurat e deritashme për regjistrim të një biznesi kanë qenë shumë të stërzgjatura dhe të mundimshme.
Ndërsa Gazmend Mejzini, kryeshef Ekzekutiv i Agjencionit për Regjistrimin e Bizneseve në Kosovë (ARBK), nënshkrimin e këtij memorandumi e ka cilësuar si rrumbullakim i reformave.

“Është e një rëndësie të veçantë se kjo u mundëson bizneseve që, përpos regjistrimit të biznesit, mund ta marrin edhe certifikatën, numrin fiskal dhe certifikatën e TVSh-së në një vend me një procedurë të vetme”, tha Mejzini.

Procedurat e deritashme për regjistrim të një biznesi kanë qenë shumë të stërzgjatura dhe të mundimshme.

Për shkak të klimës jo të mirë të të bërit biznes, Qeveria e Kosovës është kritikuar në raportet e organizatave të ndryshme ndërkombëtare, gjë e cila edhe ka bërë që shumë investitorë të mos investojnë në Kosovë.