Themelohen katër çmime për trashëgimi kulturore

Themelohet Çmimi për Veprimtari në Fushën e Trashëgimisë Kulturore “Dea Dardanicae”; Çmimi për Merita të Veçanta “Shtjefën Gjeçovi”; Çmimi për Vepër Shkencore “Zef Mirdita” dhe Çmimin për Menaxhim Institucional “Muhamed Shukriu”

Foto: Parku Arkeologjik "Ulpiana" ne Kosove

Ministria kosovare e Kulturës, Rinisë dhe Sportit ka nxjerr sot një rregullore për dhënien e katër çmimeve kulturore e shkencore. Këto çmime, sipas Ministrisë, u jepen personaliteteve të shquara për mbrojtjen, ruajtjen dhe promovimin e trashëgimisë kulturore shqiptare brenda dhe jashtë vendit.

Ministria nxjerr rregullore për Dhënien e Çmimit për Veprimtari në Fushën e Trashëgimisë Kulturore “Dea Dardanicae”; Çmimin vjetor për Merita të Veçanta “Shtjefën Gjeçovi”; Çmimin Vjetor për Vepër Shkencore “Zef  Mirdita” dhe Çmimin Vjetor për Menaxhim Institucional “Muhamed Shukriu”.

Këto çmime, sipas këtij dikasteri jepen në pajtimin me rregulloren për Fushat e Përgjegjësisë Administrative të Zyrës së Kryeministrit dhe Ministrive.

“Rregullorja specifikon procedurat e konkurrimit për çmimet në fushat specifike, si dhe mënyrën e dhënies së çmimeve, e cila bëhet nëpërmes jurisë profesionale që e themelon ministria|”, thuhet në njoftimin për media të Ministrisë së Kulturës, Rinisë dhe Sportit.

Çmimet kanë vlerë financiare: Çmimi për Veprimtari Jetësore në Fushën e Trashëgimisë Kulturore “Dea Dardanicae” shpërblehet me 5 mijë euro; Çmimi Vjetor për Merita të Veçanta “Shtjefën Gjeçovi” shpërblehet me 2 mijë e 500 euro; Çmimi Vjetor për Veprën Shkencore “Zef Mirdita”  shpërblehet me 2 mijë e 500 euro; Çmimi vjetor për Menaxhim Institucional “Muhamed Shukriu” shpërblehet me 2 mijë euro.

“Ministria e Kulturës, Rinisë dhe Sportit, nëpërmjet këtyre çmimeve, synon të përkrah personalitet që kontribuojnë në ruajtjen, studimin dhe promovimin e trashëgimisë kulturore të Kosovës” thuhet në njoftim.