Thellohet varfëria e skajshme në Kosovë

Safet Gërxhaliu: "Varfëria në Kosovë, bombë e kurdisur për vendin"

Varfëria  e skajshme, sipas Kryetarit të i Odës Ekonomike të Kosovës, Safet Gërxhaliu, pritet të thellohet ende. Nuk bëhet fjalë për hapje të vendeve të reja të punës e as për investime të huaja, dhe kjo falë imazhit të shkatërruar të Kosovës.

Safet Gërxhaliu ka theksuar se korrupsioni dhe burokracia po ndikojnë në largimin e investitorëve të huaj. Ai shpreh shqetësimin se një ditë edhe bizneset kosovare do ta braktisin vendin. Afaristët, sidomos prodhuesit ai i quan heronjtë e pasluftës. Por, për fat të keq, sipas tij, nga qarqe të caktuara institucionale, biznesmeni kosovar shihet vetëm si subjekt për gjobitje dhe grabitje.

Varfërinë në Kosovë, ai e ka quajtur bombë të kurdisur për vendin.

“Në qoftë se analizohen premtimet e bëra nga dikastere të caktuara qeveritare në fund të vitit 2011, se viti 2012 do të jetë vit i mbështetjes dhe i përkrahjes më të madhe karshi biznesit, optimizmi ka qenë shumë i madh”, shprehet Gërxhaliu.

Sipas tij, sfidat dhe vështirësitë për sektorin privat janë në rritje e sipër. “Të gjitha ato premtime që kanë qenë, kanë mbetur në formë të fjalëve, por në realitet ato nuk janë duke u shijuar nga sektori privat. E tëra kjo e dëmton edhe më tepër ambientin e biznesit. Nga mosimplementimi i të gjitha këtyre premtimeve qeveritare, druaj se më tepër jemi duke i promovuar që investimet e huaja të orientohen në vendet e rajonit, sesa të mbeten në Kosovë. Kemi të bëjmë me imazhin e dëmtuar të Kosovës, me procesin e korrupsionit dhe të burokracisë për të cilat vetëm flitet dhe asgjë nuk luftohet”, ka theksuar Gërxhaliu /albinfo&kohaditore/