“The Guardian”: Maqedonia, nën klimën e „grusht shtetit” dhe përgjimeve

Gazeta e mirënjohur britanike “The Guardian” ka shprehur në një shkrim shqetësimet për demokracinë e brishtë dhe për tensionet dhe krizën politike të krijuar pas zhvillimeve të fundi mes padive për procesin e nisur nga pushteti, të koduar si “Puç”, ndaj liderit opozitar maqedonas, Zoran Zaev dhe, në anën tjetër, zbardhjen e përgjimeve nga ky i fundit.

“The Guardian” shkruan se vendi po ballafaqohet me një krizë të përshkallëzuar politike dhe se shprehen shqetësime për ndërhyrjen e pushtetit te gjykatat dhe mediet.

Sipas “The Guardian”, Brukseli zyrtar ka rritur shqetësimet për këtë krizë politike, por, nga ana tjetër, nuk pritet eskalimi i saj në ndonjë konflikt.
Maqedonia, e cila është kandidate për anëtarësim në Bashkimin Evropian, përballet me një krizë të përshkallëzuar politike mes dyshimeve të një “grusht shteti” të planifikuar dhe një skandali të përgjimeve të publikuar nga opozita.

Sipas gazetës, lideri i opozitës maqedonase, Zoran Zaev, edhe këtë të premte lëshoi të ashtuquajturat ‘bomba’ kundër qeverisë, ku u publikuan një seri bisedash të përgjuara të kryeministrit Nikola Gruevski dhe zyrtarëve të tjerë, në të cilën diskutohet për ndërhyrje në procese gjyqësore, medie dhe planifikime urbane.

Maqedonia është kandidate zyrtare për anëtarësim në BE që nga viti 2005, por negociatat kanë qenë në mënyrë të përsëritur të bllokuara nga Greqia për shkak të mosmarrëveshjeve në lidhje me emrin e vendit.

Derisa zyrtarët e BE-së kanë përsëritur çdo vit rekomandimin për nisjen e negociatave, në Maqedoni janë rritur shqetësimet për rrethimin e vlerave evropiane, sidomos për shkak të ndërhyrjes së pushtetit ndaj lirisë së medies dhe gjyqësorit.

Lideri opozitar, Zaev, pretendon se bisedat e ardhshme të përgjuara do të vënë në dukje makinacionet e dyshuara të Gruevskit mbi “çështjen e emrit” dhe mbylljen e një stacioni televiziv të opozitës, transmetojnë mediet në Shkup.

Ai ka thënë gjithashtu se zbulimi i përgjimeve të tjera në të ardhmen mund të përfshijnë edhe elemente etnike. Qeveria akuzon Zaevin për spiunazh dhe komplot për një grusht shtet.

Tensionet në Maqedoni kanë qenë në rritje që prej zgjedhjeve të kontestuara në prill 2014, në të cilat partia në pushtet konservatore VMRO-DPMNE e Gruevskit mundi partinë ish-komuniste Social Demokrate të Zoran Zaev (SDSM), edhe atë për të katërtën herë me radhë. Opozita deklaroi se zgjedhjet ishin manipuluar dhe vjedhur nga pushteti, siç quhet, diktatura e Gruevskit.

Autoritetet në Shkup pranojnë se vendi ka mangësi, por këmbëngulin se procesi i pranimit në BE do të ndihmojë në ndërtimin e një sistemi më transparent e funksional në vend. Mbështetja për anëtarësim në BE është e lartë, në rreth tre të katërtat e popullsisë.