Thaçi nga Haga: Pozita dhe opozita të ulen bashkë dhe të dakordohen për çështjet strategjike

Keystone EPA/VALDRIN XHEMAJ

Ish-presidenti i Kosovës, Hashim Thaçi, ka bërë thirrje për një dakordim të gjerë politik ndërmjet partive në pushtet dhe atyre opozitare, në intervistën e tij të fundit për emisionin “Debat Plus”, para shpalljes së aktgjykimit në Hagë.

Thaçi ka vlerësuar se në situatën aktuale politike në Kosovë është e nevojshme që pozita dhe opozita të ulen në një tryezë të përbashkët dhe të gjejnë pajtim për çështje me rëndësi strategjike për vendin.

Sipas tij, në fokus të këtij dakordimi duhet të jenë siguria nacionale, reformat demokratike dhe zgjedhore, politika e jashtme, marrëveshjet ndërkombëtare dhe rritja e investimeve në fushën e mbrojtjes.

Ai ka përmendur gjithashtu integrimin e Kosovës në NATO dhe Bashkimin Evropian, forcimin e raporteve me Shtetet e Bashkuara dhe Shqipërinë, si dhe çështjen e dialogut me Serbinë.

“Politika kosovare, pozitë dhe opozitë, duhet të ulet në një tryezë, të diskutojë dhe të pajtohet rreth disa zotimeve të përbashkëta”, ka deklaruar Thaçi.

Ndër temat që ai i sheh si të rëndësishme për një marrëveshje politike është edhe mënyra e zgjedhjes së presidentit, duke e përmendur zgjedhjen e drejtpërdrejtë nga qytetarët si një mundësi për shmangien e krizave institucionale.

Thaçi ka theksuar se një konsensus i tillë do të duhej të përfshinte edhe orientimin euroatlantik të Kosovës, marrëdhëniet me partnerët ndërkombëtarë dhe çështjet që lidhen me sigurinë dhe mbrojtjen e vendit.