Thaçi: Kontrolli në veri i ka dhënë kuptim perspektivës evropiane

"Nuk janë barrikadat perspektivë, por rendi, ligji dhe lëvizja e lirë e njerëzve", thotë Thaçi

Kryeministri Hashim Thaçi ka thënë se marrja nën kontroll e kufirit Kosovë-Serbi, përkatësisht pikat 1 dhe 31, i kanë dhënë kuptim perspektivës evropiane të Republikës së Kosovës.

Ai ka njoftuar se ka filluar largimi i disa barrikadave të vendosura nga strukturat kriminale në veri, përderisa ka thënë se nuk janë barrikadat perspektivë, por rendi, ligji dhe lëvizja e lirë e njerëzve.

Kreu i ekzekutivit ka deklaruar se Kosova sikur të gjitha vendet e rajonit e ka objektiv integrimin evropian, por paraprakisht sikur secili shtet në rajon edhe Kosova duhet ta ketë të qartë integritetin territorial.

Sipas tij vendimet e Qeverisë së Kosovës për shtrirjen e ligjshmërisë dhe kushtetutshmërisë në veri janë në përputhshmëri me ligjet vendore e dokumentet ndërkombëtare.

Ndërkaq zëvendëskryeministrja dhe ministrja e Tregtisë dhe Industrisë, Mimoza Kusari-Lila ka folur për rezultatet që ka sjell masa e reciprocitetit. 

Ajo ka theksuar se nga shënimet që vijnë nga asociacionet e biznesit vërehen trende pozitive nga masa e reciprocitetit, të cilat po reflektohen sidomos në sektorin e prodhimit.