Tetë milionë euro më i “shkurtuar” buxheti për diplomacinë kosovare

Reduktimin për tetë milion euro më pak krahasuar me vitin paraprak, nuk e kanë pritur mirë përfaqësuesit e Kosovës në botë

Në vend që të rritet buxheti për ambasadat dhe përfaqësitë diplomatike të Kosovës nëpër botë, ka ndodhur e kundërta. Për tetë milionë euro është shkurtuar buxheti për Ministrinë e Punëve të Jashtme (MPJ).

Reduktimin për tetë milion euro më pak krahasuar me vitin paraprak, nuk e kanë pritur mirë përfaqësuesit e Kosovës në botë, njëri nga të cilët i ka thënë Zërit se ky buxhet doemos reflekton në punën e tyre, për faktin se mirëqenia sociale, kohën e fundit për shkak të refleksioneve financiare globale, është përkeqësuar.

Zëdhënësi i Ministrisë së Punëve të Jashtme (MPJ), Artan Behrami ka thënë se shkurtimet buxhetore nuk do të kenë asnjë ndikim negativ në punën e kësaj ministrie dhe institucioneve që veprojnë nën ombrellën e saj.

“Kjo nuk do të pengojë punën tonë, e as prioritetet tona që i kemi si ministri. Shkurtimet buxhetore kanë të bëjnë me investime kapitale, për të cilat në këtë fazë MPJ-ja nuk ka nevojë”, ka thënë Behrami.

Sipas tij, shkurtimet buxhetore kanë të bëjnë vetëm me vendimin për të mos ndarë më mjete për blerjen e godinave për ambasada.

Zvogëlime janë bërë edhe në të gjitha fushëveprimet e MPJ-së. Te mallrat dhe shërbimet buxheti është shkurtuar për më shumë se katër milionë euro, te shpenzimet kapitele një milion euro, ndërsa dyqind mijë euro do t’i kenë më pak shpenzimet komunale sesa në vitin 2010.

Megjithatë drejtuesit e MPJ-së janë kujdesur që diku të ketë rritje. Përjashtim është bërë vetëm te rrogat dhe mëditjet, ku sivjet mendohet të ketë mbi gjysmë milioni euro më shumë sesa vitin e kaluar.