Tetë kompani nga Kosova promovojnë produktet në panairin “Anuga 2025” në Këln të Gjermanisë

Me mbështetjen e MINT/KIESA, tetë kompani nga Kosova nga data 4 tetor po marrin pjesë në panairin më të madh ndërkombëtar të industrisë ushqimore dhe të pijeve “Anuga 2025”, që po mbahet në Këln të Gjermanisë, përcjell albinfo.ch.

Kompanitë pjesëmarrëse kosovare janë: “Vitafood” SH.P.K., “Camel” SH.P.K., “Agro Florentina” SH.P.K., “BBF Company” SH.P.K., “Frutti” SH.P.K., “Extra Fruit Fillings” SH.P.K., “Royal Beverage” L.L.C. dhe “Ananas Impex” SH.P.K.

Gjatë ditëve të panairit, kompanitë kosovare po prezantojnë produktet e tyre dhe po zhvillojnë takime me kompani të ndryshme ndërkombëtare, me qëllim krijimin e bashkëpunimeve të reja dhe gjetjen e tregjeve të reja për eksport.

Në stendën e Kosovës po ekspozohen produkte të ndryshme nga sektori i ushqimit dhe pijeve, përfshirë: lëngje frutash, pije freskuese dhe të gazuara, pije energjike, produkte konditorie (keksa, smoki, biskota, flips, wafers), erëza, supa, salca, krem pistachio, karamel për trileqe, fruit fillings, fruta të thata, protein bars, bimë mjekësore-aromatike, kërpudha të thata, si dhe produkte organike dhe EKO.

Panairi “Anuga 2025” shtrihet në një sipërfaqe prej 284,000 m² dhe vizitohet nga mbi 140,000 vizitorë profesionalë nga 200 shtete, të cilët njihen me produktet më të fundit nga 7,900 ekspozues nga mbi 118 vende të botës. Kosova këtë vit prezantohet krahas shteteve si SHBA, Britania e Madhe, Italia, Spanja, Turqia, Franca, Holanda, Greqia, Belgjika e shumë të tjera.

MINT/KIESA ka siguruar për kompanitë nga Kosova një hapësirë ekspozuese prej 84 m², e vendosur në korridorin kryesor, salla 2.1, stenda nr. D008g.

Panairi do të jetë i hapur deri më 8 tetor 2025.