Televizioni gjerman BR për herë të parë transmeton direkt faljen e Bajramit

Më 17 korrik televizioni gjerman BR transmeton për herë të parë drejtpërdrejt në Gjermani faljen e namazit të Fiter Bajramit.

Transmetimi historik do të bëhet nga xhamia në Penzberg të Munchenit.

Televizioni publik gjerman BR dhe radioja lokale Bayerischen Rundfunk kanë premtuar një emision special që do t’i kushtohet festës më të madhe të myslimanëve.

Ceremoninë e faljes së Bajramit do të udhëheqë një imam shqiptar. Bëhet fjalë për Bejnamin Idrizin nga Shkupi i Maqedonisë.

Ky i fundit e ka verësuar të jetë historik një hap i tillë dhe ka thënë se do të bëjë përpjekje të përcjellë mesazhe si për myslimanët, ashtu edhe për jomyslimanët në Gjermani.

„Do të flas për vlerat tona të përbashkëta dhe do t’i bëj thirrje shoqërisë gjermane që të hapet ndaj myslimanëve dhe të vizitojë xhamitë tona, por do të ftoj edhe myslimanët që të hapen ndaj shoqërisë gjermane”, ka thënë Idrizi.

Idrizi thotë se transmetimi direkt i faljes së Bajramit do t’i ndihmojë myslimanët që të ndihen më të mirëpritur në shoqërinë gjermane.

Ky hapi i transmetuesit publik gjerman vjen dy javë pasi që kanclerja Merkel mori pjesë në një iftar për herë të parë si kancelare dhe tha se Islami ishte pjesë e shoqërisë gjermane.

Xhamia e ndërtuar në qytetin e vogël bavarez Penzberg në vitin 2005 ka kapacitet për 300 deri në 400 besimtarë, por do të krijohen edhe hapësira shtesë për të gjithë të interesuarit. Besohet së në Gjermani jetojnë së paku 4 milionë myslimanë.

Linku:
http://www.br.de/themen/religion/fastenbrechen-festgebet-ramadan-100.html