“Të varfrit mund të ecin këmbë nëse maskat për autobus ju duken shtrenjtë”

"Transporti lokal brenda qytetit është i mundur edhe me biçikletë ose me këmbë, gjë që madje zvogëlon rreziqet për shëndet"

Një shef i zyrës për punë sociale në Bazel është bërë objekt kritikash për një përgjigje pa takt që ka dhënë në raport me klientët e zyrës së tij.

“Për njerëzit që nuk kanë ndonjë arsye të fortë për të përdorur transportin publik, duket e arsyeshme që ata të bartin vetë kostot shtesë ose të heqin dorë nga transporti publik, nëse nuk duan të paguajnë për maskën. Transporti lokal brenda qytetit është i mundur edhe me biçikletë ose me këmbë, gjë që madje zvogëlon rreziqet për shëndet”.

Kështu i është përgjigjur Ruedi Illes një kërkese që Caroline Brunner, anëtare e degës së Bazelit të “Avenir 50 plus”, i ka bërë Departamentit Social të Bazelit, shkruan 20minuten.ch. Në një e-mail për kryetarin e zyrës Ruedi Illes ajo i ka kërkuar zyrës në fjalë që të hartojë një zgjidhje “sa më shpejt të jetë e mundur”, transmeton albinfo.ch.

Ajo me atë rast ka sugjeruar dhënien e maskave ​​falas për popullatën e prekur (të varfër) ose shpërndarjen e kuponave për ta.

Përgjigja e Ruedi Illes ka shkaktuar indinjatë tek shoqata “Avenir 50 Plus”, për më tepër duke e ditur se departamenti social i Bazelit drejtohet nga një politikan i njohur socialdemokrat Christoph Brutschin.

Pas kritikave, ka reaguar Illes duke konfirmuar për gazetën se megjithatë është vendosur që personave të varur nga ndihmat sociale t`u jepen maskat mbrojtëse falas, përcjell albinfo.ch. Fillimisht, janë në dispozicion 7.000 maska shumpërdorimëshe dhe me kohë do të sigurohen edhe të tjera.

Të kujtojmë: Një pako me 50 maska për një përdorim, kushton më së paku 34 franga ndërsa ato për shumë përdorime kushtojnë rreeth 7 franga copa. Së këndejmi, konsiderohet se blerja e tyre është ngarkesë serioze për buxhetin e familjeve që jetojnë nga ndihmat sociale.

---