Të premten kryeministri i Kosovës pritet të raportojë në Kuvend për zhvillimet rreth dialogut

Albin Kurti

Partitë opozitare në Kosovë, Partia Demokratike e Kosovës dhe Lidhja Demokratike e Kosovës, kanë kërkuar raportimin e kryeministrit Albin Kurit të premten në Kuvendin e Kosovës.

Arben Gashi, shef i Grupit Parlamentar të LDK-së, pas mbledhjes së Kryesisë ka thënë se të premten e kësaj jave do të ftohet kryeministri Albin Kurti në raportim lidhur me zhvillimet e fundit në dialog, teksa u shpreh se presin që kryeministri të jetë i pranishëm.

“Presim të dimë çfarë ka ndodhur në aspektin e shtrëngimit të masës, e çka janë dakorduar për Asociacionin. Nuk ka, pse të mbahet i fshehtë dokumenti kur tashmë është pranuar nga Qeveria”, ka thënë ai.

Në anën tjetër, shefi i Grupit Parlamentar të PDK-së, Abelard Tahiri, ka thënë se rezoluta e Kuvendit e obligon kryeministrin që të raportojë çfarë ka ndodhur, përcjell albinfo.ch.

“Për ne është shumë e rëndësishme të dimë sesi do të jetë Asociacioni. Po ashtu kemi proceduar një kërkesë në lidhje me kërkesën e minatorëve. Nëse kjo nuk aprovohet, do të kërkojmë përmes seancës të së enjtes që ta vendosim në rend të ditës”, ka thënë ai.