Të përmirësohet klima e biznesit dhe të luftohet korrupsioni e krimi i organizuar

Një delegacion i Komitetit Lindor të Ekonomisë Gjermane po viziton Shqipërinë për të shqyrtuar mundësitë e zgjerimit të marrëdhënieve ekonomike gjermano-shqiptare.

Ambasadorja Susanne Schütz theksoi rëndësinë e reformave të mëtejshme, përcjell albinfo.ch.

“Shqipëria u ofron shumë mundësi investitorëve të interesuar, për shembull në fushën e energjisë, infrastrukturës, bujqësisë dhe turizmit. Prandaj, dëshiroj të inkurajoj Qeverinë shqiptare për të përmirësuar më tej klimën e biznesit dhe për të forcuar luftën kundër korrupsionit dhe krimit të organizuar. Muajt e mbetur deri në një vendim të BE-së për të hapur bisedimet e anëtarësimit duhet të përdoren nga qeveria për veprime të vendosura, për të arritur rezultate konkrete dhe të qëndrueshme”, ka thënë ajo.

Gjermania është aktualisht partneri i dytë më i rëndësishëm tregtar i Shqipërisë.

Që nga viti 1952 Komiteti Lindor përfaqëson interesat e ekonomisë gjermane në Evropën Juglindore, ndër të tjera me synimet e intensifikimit të marrëdhënieve ekonomike dhe përmirësimit të kushteve të tregtisë dhe investimeve për kompanitë gjermane.

Aktualisht anëtare të Komitetit Lindor janë më shumë se 200 kompani – nga ato të mesme deri tek kompanitë e mëdha të listuara në bursë.