Të pagjeturit e Kosovës: pas 26 vitesh, një shpresë e re

Rreth 1,600 persona vazhdojnë të figurojnë të zhdukur pas luftës së Kosovës në vitin 1999, shumica shqiptarë, ndërsa pjesa tjetër janë serbë, romë dhe pjesëtarë të pakicave të tjera.

Për familjet e tyre, lufta nuk ka mbaruar ende: boshllëku i krijuar nga mungesa e trupave dhe informacionit mbi fatin e të afërmve shoqëron çdo ditë.

Një shembull tragjik është familja Gashi nga fshati Tërnje, ku nëna dhe katër motrat u vranë gjatë një masakre nga ushtria serbe më 25 mars 1999. Pas më shumë se 26 vitesh, vendndodhja e eshtrave mbetet e panjohur, dhe përpjekjet për drejtësi në gjykatat e Beogradit kanë dështuar.

Një shpresë e re ka lindur së fundmi: më 4 shkurt 2026, në Shkodër u takuan për herë të parë përfaqësuesit e komisioneve shtetërore të Kosovës dhe Serbisë për personat e zhdukur, pas një marrëveshjeje parimore më 22 janar për krijimin e një komisioni trilateral me përfaqësues nga BE-ja.

Takimi u zhvillua në një atmosferë pozitive, dhe u vendos që procesi të intensifikohet në muajin mars, shkruan DW transmeton albinfo.ch.

Megjithatë, skepticizmi mbetet për shkak të refuzimeve të mëparshme të Serbisë për të bashkëpunuar dhe hapur arkivat shtetërore, të cilat mund të zbulonin vendndodhjen e trupave. Familjarët kërkojnë vetëm eshtrat dhe një vend ku të mund të vendosin një lule për të afërmit e tyre, duke shprehur dhimbjen e përhershme dhe kêrkesën për drejtësi.