Të hyrat bien, shpenzimet rriten

Sipas publikimit të BQK-së, shpenzimet qeveritare për investime kapitale deri në shtator të vitit 2013 shënuan rënie vjetore prej 5.7 për qind

Gjatë muajin shtator shpenzimet qeveritare për konsum të mallrave dhe shërbimeve kanë shënuar rritje vjetore prej 1.5 për qind duke arritur në 115 milionë euro, ndërsa të hyrat buxhetore shënuan rënie vjetore prej 6.2 për qind, apo në vlerë prej 1.06 miliardë euro.

Këto të dhëna kanë dalë të martën nga Banka Qendrore të Kosovës (BQK). Sipas kësaj të fundit, vlera e përgjithshme e shpenzimeve buxhetore në Kosovë deri në fund të shtatorit 2013 arriti në 1.01 miliard euro, që paraqet një ngritje prej 1.4 për qind krahasuar me periudhën e njëjtë të vitit paraprak.

“Shpenzimet qeveritare për paga dhe mëditje si dhe shpenzimet qeveritare për subvencione dhe transfere kanë shënuar rritje prej 2.4 përkatësisht 20.7 për qind duke arritur në 277.5 përkatësisht 227.3 milionë euro”, citon KL raporton e BQK-së.

Sipas publikimit të BQK-së, shpenzimet qeveritare për investime kapitale deri në shtator të vitit 2013 shënuan rënie vjetore prej 5.7 për qind.

Rënia e të hyrave buxhetore prej 6.2% i adresohet kryesisht rënies së të hyrave vetanake të komunave dhe të nivelit qendror prej 8.0 për qind dhe nivelit më të ulët të pranimeve nga emetimi i letrave me vlerë prej 18.6 për qind.

Ndërsa të hyrat neto të mbledhura nga Administrata Tatimore e Kosovës (ATK) shënuan rritje prej 12.1 për qind, duke arritur nivelin neto prej 202.9 milionë euro. Përkundër rënies së importit, të hyrat e mbledhura në kufi arritën vlerën neto prej 608.2 milionë euro, duke shënuar një ngritje prej 1.3 për qind.