Të huajt e Lucernit fitojnë të drejtën e bashkëvendosjes

Ata nuk do të mund të marrin pjesë në votime në kuptimin klasik të kësaj fjale. Të huajt me vizë C munden vetëm të nënshkruajnë ose iniciojnë kërkesa në drejtim të parlamentit

Në mesin e shumë iniciativave për të cilat është votuar sot në Zvicër ka qenë edhe ajo në Lucern për të drejtën për bashkëvendosje të të huajve në qytetin e Lucernit. Votuesit zviceranë të këtij qyteti i kanë dhënë dritën e gjelbër kësaj iniciative, e cila është mbështetur nga 60.36 për qind e tyre, në një pjesëmarrje prej 47.03 për qind në votime.

Me këtë rezultat, tash e tutje banorët me qëndrim në Zvicër që kanë shtetësi të huaj dhe me leje qëndrimi të përhershëm (vizë C) kanë të drejtë të jenë bashkëvendosës në procese të ndryshme sikurse edhe shtetasit zviceranë. Por për këtë nevojitet një kusht: për një kërkesë të tyre duhen grumbulluar 200 nënshkrime në mënyrë që ajo pastaj të bëhet çështje me të cilën duhet të ballafaqohet parlamenti i qytetit.

Në fakt, edhe me këtë ndryshim, të huajt nuk mund të marrin pjesë në votim dhe as në referendum, në kuptimin klasik të kësaj fjale. Ata munden vetëm të nënshkruajnë  ose iniciojnë kërkesa e mocione në drejtim të parlamentit, shkruan nlz.ch 

Në qytetin e Lucernit janë rreth 9 mijë të huaj që pritet të përfitojnë nga ky miratim.