Të hënën në Zvicër u skadon afati së paku 250.000 certifikatave Covid

Një studim i realizuar nga SRF në të gjitha kantonet ka treguar se rreth 250,000 njerëz në Zvicër do të humbasin certifikatat e tyre të hënën e ardhshme

Këshilli Federal ka reduktuar vlefshmërinë e certifikatave Covid për personat e vaksinuar dhe ata të shëruar, transmeton albinfo.ch. Kështu, duke filluar nga 31 janari, afati i tyre shkurtohet në 270 ditë nga 365 sa ka qenë deri më tani.

Dhe kjo, në mënyrë retrospektive.

Ata që kanë marrë dozën e fundit (të dytë) të vaksinimit përpara datës 7 maj 2021, nuk do të kenë më certifikatë të vlefshme, që  nga 31 janari. E njëjta gjë vlen edhe për të shëruarit që kanë marrë certifikatën e bazuar në një test PCR pozitiv përpara datës 7 maj.

Një studim i realizuar nga SRF në të gjitha kantonet ka treguar se rreth 250,000 njerëz në Zvicër do të humbasin certifikatat e tyre të hënën e ardhshme.

Megjithatë, duke qenë se një person mund të ketë disa certifikata të vlefshme (p.sh. një për ata që janë vaksinuar dhe një për ata që janë shëruar pas infeksionit), shumica e kantoneve nuk mund të japin numrin e saktë të të prekurve.

Por, si mund ta zgjasim certifikatën? Për të parandaluar që certifikata të bëhet e pavlefshme për shkak të rregulloreve të reja, mund ta merrni përforcuesin (vaksinën e tretë) në kohën e duhur. Praktikisht në të gjitha kantonet ka termine të lira për vaksinat përforcuese, dhe mundësojnë vaksinimin brenda një afati të shkurtër.

Zakonisht për ta bërë këtë mund të regjistroheni në faqet e internetit të kantoneve. Aty mund të shihet edhe se për sa kohë është e vlefshme certifikata, transmeton albinfo.ch. Nëse certifikata ruhet në mënyrë elektronike në aplikacionin Covid Cert, vlefshmëria përshtatet automatikisht me rregulloret e reja.

Për të shëruarit e pavaksinuar, vaksinat fillestare zakonisht janë të mundshme pa ndonjë periudhë pritjeje (më së shumti katër muaj pas infeksionit).

---