Të diplomuarit e huaj të universiteteve mund të qëndrojnë në Zvicër

@pixabay

Universitetet zvicerane tërheqin studentë nga e gjithë bota. Megjithatë, nëse nuk janë nga BE-ja, ata duhet të largohen nga vendi pas diplomimit, pasi kuota strikte vlejnë për shtetasit e vendeve të treta, shkruajnë mediat zvicerane, përcjell albinfo.ch.

Kjo do të thotë se Zvicra investon për vite me radhë në arsimimin e shtetasve të huaj, por nuk nxjerr asnjë fitim më pas.

Në të njëjtën kohë, në vend ka mungesë të punëtorëve të kualifikuar, veçanërisht në fushën e informatikës, teknologjisë dhe shkencave natyrore.

Për të ndryshuar këtë prirje, Këshilli Federal dëshiron të përjashtojë nga kuotat disa të huaj nga vendet e treta që kanë marrë një diplomë master ose që janë duke bërë doktoraturë në Zvicër.

Nëse aktiviteti i tyre fitimprurës është me “interes të lartë shkencor ose ekonomik” dhe nëse ata punojnë në sektorë ku ka mungesë të personelit të kualifikuar, ata mund të jenë në gjendje të qëndrojnë në Zvicër pas diplomimit.