Taksistët e Suboticës: Ikën shqiptarët na lan pa punë

Numri i emigrantëve kosovarë ka rënë dukshëm ditëve të fundit. Kjo i ka shqetësuar taksistët e Suboticës të cilët ankohen se kanë mbet pa punë

Rënia e numrit të emigrantëve kosovarë për të ikur jashtë vendit nëpërmjet Hungarisë, ka ngjallur zhgënjim tek ata që fitonin më së shumti në këtë eksod- taksistët e Suboticës. Këta të fundit, janë ankuar se si kosovarët që erdhën shpejt, ikën dhe i lanë pa punë.

Gazeta kroate “Jutarnji List” shkuan në një reportazh se si u zhdukën qytetarët e Kosovës nga kufiri mes Serbisë dhe Hungarisë. Gazetarët kroat kishin vizituar  Suboticën, por nuk kishin hasur në asnjë autobus me refugjatë kosovarë që pikësynim e kishin Hungarinë.

“Edhe taksistët nuk kanë punë, vetëm ndonjë prej tyre duke u ruajtur mos ta sheh policia, merret vesh me një grup të rinjsh somalezë. Për dallim nga afganët ata janë shume të rregullt, njëri nga ta me një anglishte solide sqaron se qëllimi i tyre është perëndimi, por nuk kanë në mendje ndonjë vend të zgjedhur”, shkruan në reportazh citon KP.

Sipas “Jutarnji List” taksistët kanë treguar se si kanë pasur probleme me migrantët nga Kosova dhe policia u ka ndaluar rreptësisht atyre që të voziten më larg se vendi i quajtur Paliq.

“Ata që donin të fitonin shumë, i dërgonin deri te kufiri ku përfundonin si pjesëmarrës në ndihmë të kalimit ilegal të kufirit. Vendi më i vizituar ka qenë vila ‘Lira’ në Paliq, pronë e Sami Hakajt shqiptar nga Kosova të cilën e ktheu në punkt transporti. Për një pagesë aty i siguronte strehim dhe ushqim e ku më pastaj i dërgonte matanë kufirit”, shkruan “Jutarnji list”.

Në Vilën “Lira” nuk ishte askush, as mysafir e as staf. Në derë të hyrjes shkruan porosia se janë në pushim kolektiv. “Kjo me shqiptarët nuk ka qenë punë e pastër. Ata kanë pasur ndonjë plan. Kush do të mundte që aq shumë njerëz në një periudhë të shkurtër kohore t’ i kthejë”, ka thënë një nga taksistët.

Sipas këtij reportazhi, ekzistojnë tri teori rreth asaj se pse shqiptarët e Kosovës përnjëherë ia mësynë kufijve të Bashkimit Evropian.

Një pjesë e medieve serbe shkruante se kjo është tezë e politikanëve që vala e imigrantëve ta komprometojë Serbinë që asaj prapë t’i kthehet regjimi i vizave, ndërsa rrëfimi tjetër, sipas kësaj gazete, thotë se krejt kjo i shkon për shtati Beogradit, që do të nxitë  perëndimin që ia njohu pavarësinë, e njerëzit po ikin nga shteti.

‘Ekziston edhe e treta e ndoshta më e mundshmja, e ngjashme me kryetarin e komunës Asotalom Laslo Toroçkai, i cili tha se shqiptarët nga Kosova shkuan në Gjermani për të marrë ndihma financiare ku edhe i dërguan fëmijët, dhe kur Gjermania do të vendoste t’u ndihmonte ata do të ishin të gatshëm të kthehen”, përfundon pjesa e parë reportazhit.