SVP lokale, referendum kundër bartjes së shamisë në shkolla

"Kemi grumbulluar tashmë më shumë se 400 nënshkrime sa janë të detyrueshme”, ka thënë kryetari i degës lokale të SVP-së, Hansruedi Köpel

Muaj më parë, një shkollë fillore në Au-Heerbrugg të St. Gallenit pati përjashtuar nga procesi mësimor dy vajza myslimane për shkak se mbulonin kokë me shami. Pas kësaj komuna e kishte anuluar vendimin e parë dhe u kishte dhënë të dejtë vajzave somaleze të ndiqnin mësimin  me shami.

Ndërkohë, partia SVP e këtij lokaliteti ka nisur një iniciativë për referendum dhe bëhet e ditur se ka arritur të grumbullojë numrin e duhur të nënshkrimeve për këtë gjë. “Kushtet për referendum janë plotësuar. Ne kemi grumbulluar tashmë më shumë se 400 nënshkrime sa janë të detyrueshme”, ka thënë kryetari i degës lokale të SVP-së, Hansruedi Köpel për gazetën “Der Ostschweiz am Sonntag”.

Nga ana tjetër, kryetari i shkollave në komunë, Walter Portmann mendon më ndryshe: “Së pari na duhet t`i sqarojmë disa gjëra”. Ai planifikon që këtë çështje t`ia japë për vlerësim shërbimit juridik të Departamentit të Arsimit të Kantonit të St. Gallenit.

Ai mendon kështu duke u nisur nga vendimi i Gjykatës Federale të marrë së fundi që e shpall të paligjshëm ndalimin e bartjes së shamisë myslimane në shkolla. Vendimi në fjalë i referohej ndalimit që një shkollë në Bürglen të kantonit Thurgau u ka bërë dy vajzave shqiptare nga Maqedonia për të ndjekur shkollimin me shami. Në këto rrethana, sipas Portmann, mungon baza ligjore për të futur një ndalesë të tillë në një rregullore komune.