Sveçla për bllokimin e rrugëve: Një familje që po udhëtonte në Gjermani u kthye prapa me forcë

Ministri i Punëve të Brendshme të Kosovës, Xhelal Sveçla ka reaguar pas bllokimit të rrugëve që të cojnë në pikat kufitare mes Kosovës dhe Serbisë.

Ai ka bërë të ditur se në këto protesta janë parë edhe persona të maskuar, derisa ka njoftuar se një familje që po udhëtonte për në Gjermani është kthyer prapa me forcë.

“Pas paralajmërimit të grupeve ekstremiste serbe për protesta sot pas orës 18:00, janë vërejtur grupe ekstremistësh të maskuar të cilët në prani të policisë së Serbisë, brenda territorit të Serbisë, kanë ndaluar veturat dhe legjitimuar udhëtarët. Para pak çastesh, një familjes e cila po udhëtonte për në Gjermani, i është pamundësuar vazhdimi i udhëtimit dhe është kthyer prapa me forcë”, ka shkruar Sveçla.

Sipas tij, këto veprime janë të papranueshme.

“Kjo po ndodhë para syve të policisë së Serbisë, fakt ky që e bën atë bashkë fajtore. Këto akte fashiste ku serbët lejohen pavarësisht dokumentacioneve që posedojnë kurse shqiptarët pengohen pavarësisht dokumentacioneve që posedojnë, janë absolutisht të papranueshme për ne. Prandaj, deri në stabilizimin e qarkullimit normal, të pa pengueshëm dhe të sigurtë për të gjithë udhëtarët, pika kufitare në Bërnjak mbyllet për qarkullim”, shkroi ministri i Punëve të Brendshme.