Sveçla: Kemi neutralizuar grupet ekstremiste në veri

Sot, ministri i Brendshëm, Xhelal Sveçla, ka folur për situatën e sigurisë në pjesën veriore të Kosovës, përcjell albinfo.ch.

Atje, tha ai, institucionet e sigurisë janë ballafaquar me sulme të vazhdueshme nga grupe ekstremiste, që kulmuan me sulmin terrorist të 24 shtatorit, i cili, sipas ministrit, “falë angazhimit dhe sakrificës së policisë së Kosovës, por edhe institucioneve të tjera, u menaxhua jashtëzakonisht mirë, edhe pse humbën një pjesëtar të policisë, heroin Afrim Bunjaku”.

“Ky ishte kulminacion, por gjatë këtyre viteve, Policia e Kosovës është sulmuar rreth 100 herë nga këto grupe ekstremiste. Lajmi i fundit është se qysh një sulm e kemi pasur edhe dje, ku është rrezikuar jeta e një pjesëtari të policisë. Megjithatë, situata e sigurisë atje është përmirësuar ndjeshëm, e për disa qarqe është pabesueshëm mirë, dhe prezenca e të gjitha institucioneve legale vetëm se po rritet dhe po funksionojnë në mënyrë sa më normale”, deklaroi Sveçla në takimin e Këshillit për Demokraci dhe të Drejta të Njeriut.

Ai tha se është arritur neutralizimi i këtyre grupeve ekstremiste në këtë pjesë të vendit.

Ministri foli edhe për targat dhe regjistrimin e veturave nga serbët lokalë të veriut në targa të Republikës së Kosovës. Kjo, tha, e rrit ndjeshëm sigurinë në atë zonë.