Sulm tragjik në një kishë në Michigan: një i vdekur dhe disa të plagosur

Foto FB: Crime with Sara

Të paktën një person ka humbur jetën dhe disa të tjerë janë plagosur pas një sulmi me armë dhe zjarri në një kishë në qytetin Grand Blanc, Michigan, mëngjesin e së dielës.

I dyshuari për të shtënë u vra nga policia, tha Departamenti i Policisë së Qarkut Grand Blanc, duke shtuar se nuk kishte kërcënim të mëtejshëm për publikun, transmeton albinfo.ch.

Zyrtarët thanë se i dyshuari drejtoi automjetin e tij në Kishën e Jezu Krishtit të Shenjtorëve të Ditëve të Mëvonshme në Grand Blanc, një qytet 96 km në veriperëndim të Detroitit, të dielën në mëngjes dhe hapi zjarr.

Ata shtuan se i dyshuari, një mashkull 40-vjeçar, i vuri flakën “qëllimisht” kishës. Zjarri është vënë nën kontroll që atëherë, por zyrtarët thanë se kanë frikë se do të gjejnë viktima të tjera kur të jetë e sigurt të hyjnë në ndërtesë, shkruan bbc.

Oficerët thanë se nëntë të plagosurit pësuan plagë me armë zjarri dhe janë në gjendje të qëndrueshme në spital.

Policia e Grand Blanc shtoi se 100 agjentë të FBI-së janë vendosur për të ndihmuar me hetimin.

Drejtori i FBI-së, Kash Patel, konfirmoi në një deklaratë se agjentët federalë po ndihmojnë autoritetet lokale. Ai e quajti incidentin “një akt frikacak dhe kriminal”.

Prokurorja e Përgjithshme e SHBA-së, Pam Bondi, tha në një postim në X se kishte marrë informacione mbi “atë që duket të jetë një të shtënë dhe zjarr i tmerrshëm” në kishë.

“Një dhunë e tillë në një vend adhurimi është zemërthyes dhe rrëqethëse”, tha Bondi. “Ju lutem bashkohuni me mua në lutje për viktimat e kësaj tragjedie të tmerrshme”.

Në një deklaratë të veçantë, Guvernatorja e Michiganit, Gretchen Whitmer, tha: “Dhuna kudo, veçanërisht në një vend adhurimi, është e papranueshme”, duke shtuar se ajo po monitoronte situatën.