Spitalet në Vaud, në nivelin maksimal të mbipopullimit 

(KEYSTONE/Laurent Gillieron)

Departamenti i urgjencës në Vaud po përballet me një fluks të lartë pacientësh për shkak të disa viruseve sezonale.

“Tani kemi një epidemi dimërore të Covid që i shtohet asaj të gripit. Këtë vit, ato ishin pothuajse të njëkohshme”, shpjegon Pierre-Nicolas Carron, kreu i departamentit të urgjencës CHUV, në emisionin Forum, transmeton albinfo.ch.

Kjo mbingarkesë, të cilën po e përjetojnë edhe departamentet e urgjencës në kantonet e tjera frëngjishtfolëse, e vë nën tendosje gjithë sistemin spitalor. Si rezultat, disa shtrime spitalore ose trajtime të caktuara nuk mund të kryhen menjëherë.

“Ne kemi pacientë që do të qëndrojnë në dhomën e urgjencës, të cilët do të kalojnë natën atje, apo edhe 24 apo 36 orë, herë në ambiente të përbashkëta të disa njerëzve, herë në korridore”, thotë Pierre-Nicolas Carron.

“Dhe për spitalin, kjo situatë kërkon përshtatje të vazhdueshme. Kjo mund të çojë në shtyrjen e operacioneve për t’u siguruar që ata të kenë një shtrat të përshtatshëm spitalor, veçanërisht në kujdes intensiv”, vazhdon ai.

Kjo situatë, e cila po vazhdon prej disa javësh, ka shtyrë kantonin Vaud të kalojë në nivelin 4 – niveli maksimal – i sistemit kantonal të ndihmës spitalore. “Niveli 4 ilustron faktin se ne po arrijmë kufijtë e zgjidhjeve tona”, shpjegon Pierre-Nicolas Carron.

Megjithatë, ai dëshiron të qetësojë popullsinë, “shërbimet e urgjencës janë duke punuar dhe mbeten të disponueshme”.

Por për mjekun duhet të ketë një koordinim më të mirë mes spitaleve si dhe zgjidhje për të lehtësuar orientimin e pacientëve, të cilët dynden drejt urgjencës. “Shërbimet e urgjencës, nëpërmjet rolit të tyre si porta për në spitale, i nënshtrohen kësaj mbingarkese, me vështirësi për të mirëpritur të gjithë pacientët dhe për t’i shtruar ata në spital”, saktëson ai.

Për të korrigjuar këtë, kantoni Vaud rekomandon, së pari, të shkoni te mjeku juaj. Nëse kjo nuk është e disponueshme, qendra telefonike për mjekët në thirrje mund të kontaktohet në numrin 0848 133 133. “Shpesh është një mënyrë për të qetësuar pacientët dhe për t’i udhëhequr sa më mirë brenda sistemit shëndetësor”, tregon Pierre-Nicolas. Carron.

Së fundi, është gjithashtu e mundur të kërkoni këshilla nga një farmaci nëse keni dyshime për nevojën për të shkuar në dhomën e urgjencës.