Specializim në Gjermani për mjekët nga Maqedonia

Mjekë nga Maqedonia do mund të specializojnë në Qendrën Mjekësore “Nürnberg” të Gjermanisë

Mediat e Shkupit raportojnë për një marrëveshje tashmë të firmosur nga ministri maqedonas i Shëndetësisë, Nikola Todorov, dhe drejtori i Qendrës në Nürnberg, Güter Niklevski.

“Kjo është klinika e parë ku kemi mundësi t’i dërgojmë mjekët tanë, në specializim zyrtar. Nuk e kam fjalën për trajnim… ne kemi dërguar edhe në trajnime më afatgjate, por jo edhe në specializim. Me këtë që firmosëm sot, mjekët tanë mund të kryejnë specializimin dhe t’i nënshtrohen provimit e të fitojnë specializimin gjerman”, tha Nikolla Todorov, ministër i shëndetësisë.

“Bashkëpunimi mes Nürnbergut dhe Shkupit ka histori thuajse 40 vjeçare. Ky bashkëpunim ka filluar në fushën e Oftalmologjisë dhe Gastro-hematologjisë dhe deri tani, tek qendra jonë në Nürnberg, kanë qenë rreth 50 mjekë dhe personel tjetër mjekësor”, u shpreh Güter Niklevski, drejtor i Spitalit, Nürnberg..

Kjo qendër është e përbërë nga 38 klinika dhe është një nga qendrat më të mëdha në Evropë. Me specializimin e mjekëve nga Maqedonia në Gjermani, autoritetet mjekësore shpresojnë se do të përmirësojnë njohuritë në fushat deficitare në Maqedoni.

Sipas ligjit, mjekët që do të fitojnë këto njohuri janë të obliguar që të punojnë për 6 vjet në shëndetësinë publike