Sot takohen Kurti e Vuçiq

Kryeministri i Kosovës, Albin Kurti do të takohet sot me presidentin e Serbisë, Aleksandar Vuçiq në Bruksel në kuadër të dialogut në mes të dyja vendeve.

Në njoftimin e publikuar në faqen zyrtare të Bashkimit Evropian thuhet se takimi nis në orën 10:30 dhe do të fokusohet në rrugën përpara në dialog si dhe arritjen e një marrëveshjeje gjithëpërfshirëse të normalizimit të marrëdhënieve.

Të pranishëm gjatë takimit të krerëve të dy shteteve do të jenë edhe përfaqësuesi i lartë i Bashkimit Evropian, Josep Borrell dhe përfaqësuesit special për dialogun, Miroslav Lajçak.

Në takim do të trajtohen çështjet aktuale dhe do të synohet zbutja e tensioneve mes palëve. Gjithashtu, përfaqësuesi i lartë i BE-së do të zhvillojë takime të veçanta me secilin lider.

Kurse, në fund të takimit përfaqësuesi i lartë i BE-së, Josep Borrell, do të mbajë një deklaratë për media.

Kryeministri Kurti mbrëmë është takuar me të dërguarin e Bashkimit Evropian për dialogun mes Kosovës dhe Serbisë, Mirosllav Lajçak dhe të dërguarin e Shteteve të Bashkuara për Ballkanin Perëndimor, Gabriel Escobar. Kurti e ka quajtur këtë takim përgatitor para takimit të sotëm me presidentin serb, Aleksandar Vuçiq./Albinfo.ch

---