Sommaruga: Askund në botë qytetari nuk ka fuqi si në Zvicër

Fakti se krahas Qeverisë Federale dhe Parlamentit edhe qytetarët ushtrojnë ndikimin dhe përgjegjësinë e tyre, krijon afërsi dhe identitet, për të cilat ka nevojë Zvicra

Duke iu drejtuar kombit në fjalimin e saj të fillimit të vitit, presidentja e re e Zvicrës, Simonetta Sommaruga ka lavdëruar sistemin politik të Zvicrës dhe demokracinë e drejtpërdrejtë si vlerë që e bën Zvicrën të veçantë. Rrënjët lokale dhe lidhjet globale janë për Sommarugën diçka që e pasuron Zvicrën.

“Askund tjetër qytetarët nuk kanë kaq shumë fuqi dhe përgjegjësi sikur në vendin tonë. Demokracia jonë është e guximshme, ajo na beson ne të gjithëve shumëçka, na jep të drejta dhe përgjegjësi. Por ka edhe njerëz të tillë që thonë se demokracia jonë e drejtpërdrejtë nuk është në hap me kohën. Në botën tonë të rrjetëzuar, sipas tyre, populli  nuk e ka të mundur që të sjellë vendime komplekse. Por unë nuk e ndaj këtë mendim në asnjë mënyrë”, është shprehur Sommaruga. Dhe këtë e ka arsyetuar duke thënë se sistemi i demokracisë së drejtpërdrejtë përputhet në mënyrë të shkëlqyer me kohën e sotme.

Fakti se krahas Qeverisë Federale dhe Parlamentit edhe qytetarët ushtrojnë ndikimin dhe përgjegjësinë e tyre, krijon afërsi dhe identitet. Ndërsa Zvicra ka nevojë për këto dy vlera më shumë se kurrë, në një botë të globalizuar.

Fjalimin e saj presidentja e posazgjedhur e Zvicrës e ka mbajtur në tregun e pemëve dhe perimeve që është i vendosur në afërsi të Pallatit Federal.