S’ka probleme me lëndime te Kombëtarja shqiptare

Burim Kukeli dhe Ledian Memushaj janë gati për takimin ndaj Spanjës, ashtu si edhe Ansi Agolli, Ermir Lenjani dhe Taulant Xhaka

Pas misionit të përmbushur me fitoren në Lihtenshtajn, e gjithë vëmendja e Kombëtares shqiptare, tashmë është e përqendruar te ndeshja e së dielës kundër Spanjës, shkruan albinfo.ch.

Në Vaduz trajneri Gianni De Biasi la pushim disa titullarë, për t’i pasur në formën më të mirë për duelin kundër ish-kampionëve të botës dhe Evropës. Kapiteni Ansi Agolli, Ermir Lenjani dhe Taulant Xhaka e panë nga stoli ndeshjen me Lihtenshtajnin, ndërsa Amir Abrashi u aktivizua vetëm pjesën e parë.

Asnjë shqetësim, ndërkaq, për Burim Kukelin, që megjithëse në fundin e pjesës së parë la fushën e lojës duke prekur gjurin, do të jetë në dispozicion të ekipit përballë Spanjës. I gatshëm për De Biasin do të jetë edhe mesfushori Ledian Memushaj, i cili ndaj Lihtenshtajnit nuk ishte as në stol për shkak të problemeve fizike me të cilat u paraqit në grumbullimin e skuadrës.