S’ka përballje mes Kosovës dhe Serbisë

Në Kongresin e mbajtur më 3 maj në Budapest, UEFA e pranoi Kosovën në gjirin e saj me 28 vota pro dhe 24 kundër, duke përfshirë edhe Rusinë

Federata e Futbollit e Kosovës dhe ajo e Serbisë, duhet të mundohen që ekipet e tyre të mos ndeshen mes veti në turnetë e UEFA-s. Kështu ka thënë sekretari i përgjithshëm i FFK-së, Eroll Salihu për agjencinë e lajmeve ruse “TASS”, shkruan albinfo.ch.

“Ne kemi marrëdhënie me Federatën e Futbollit të Serbisë dhe do të zgjidhim çështjen e ekipeve. Mendoj se për momentin zgjidhja më e mirë do të ishte që skuadrat të mos ndeshen njëra me tjetrën. Ne do të punojmë me klubet tona dhe sigurisht edhe me tifozët në të ardhmen për këtë çështje”, deklaroi Salihu.

Në Kongresin e mbajtur më 3 maj në Budapest, UEFA e pranoi Kosovën në gjirin e saj me 28 vota pro dhe 24 kundër, duke përfshirë edhe Rusinë. Tashmë Kosova mund t’i bashkohet edhe FIFA-s dhe të marrë pjesë në kualifikimet e Kampionatit Botëror, që në vitin 2018 do të mbahet në Rusi.