Shtyhet mbledhja vjetore e Forumit Ekonomik në Davos

(KEYSTONE/Laurent Gillieron)

Për shkak të përhapjes së variantit Omicron, është shtyrë mbledhja vjetore e liderëve të biznesit dhe politikës në Forumin Ekonomik Botëror në Davos të Zvicrës. Kjo mbledhje ishte parashikuar të mbahet nga data 17 deri në 21 janar, ndërsa tani është planifikuar për “në fillim të verës”, përcjell albinfo.ch.

“Shtyrja e takimit vjetor nuk do të pengojë zhvillimet përmes mbledhjeve të vazhdueshme online të liderëve nga biznesi, qeveria dhe shoqëria civile”, tha Prof. Klaus Schëab, themelues dhe kryetar ekzekutiv i Forumit Ekonomik Botëror.

Vitin e kaluar takimi vjetor i WEF u zhvendos nga Davos në Singapor për shkak të Covid në muajin gusht, ngjarje që edhe kjo u anulua.

Edhe Zvicra, si shumë vende të tjera evropiane, ka filluar me masa kufizuese për shkak të përhapjes së variantit Omicron.

“Me gjithë protokollet e rrepta shëndetësore, transmetueshmëria e Omicron dhe ndikimi i tij në udhëtime dhe lëvizshmëri e kanë bërë të nevojshme shtyrjen”, tha WEF.

Konferenca e nisur për herë të parë në vitin 1971 – e cila kritikohet nga disa si elitare – deri vitin e kaluar mbahej çdo vit në vendpushimin e skive alpine të Davos.