Shtrëngohen edhe më tej masat ndaj Covid -19 në Austri

Një nga masat e reja është që, banorët në Austri obligohen të bartin maskën FFP2.

Pavarësisht masave të rrepta, në Austri numri i të infektuarave vazhdon të jetë i madh. Për këtë arsye qeveria austriake do të ashpërsojë edhe më tej masat, shkruan heute.at, përcjell albinfo.at.

 

• Zgjatje e distancës minimale

Nga e hëna, (25 janar), distanca mes njerëzve në të gjitha hapësirat publike duhet të jetë së paku dy metra nga njëri-tjetri. Vetëm personat që jetojnë në të njëjtën shtëpi, të afërm të ngushtë apo partnerë që nuk jetojnë në të njëjtën shtëpi, përjashtohen nga rregullorja. Të tjerët, të cilët nuk iu përmbahen kësaj rregullore, pason dënimi: 50 euro

 

• Detyrim i bartjes së maskës FFP2

Në supermarkete, transportin publik, farmaci, zyra shërbyese dhe posta, në banka dhe vende të tjera të ngjashme, mund të hyni vetëm me një maskë mbrojtëse FFP2. Maskat FFP2, të cilat kanë një çmim shumë të shtrenjtë, ofrohen nëpër supermarkete me një çmim mjaft të volitshëm, prej 59 cent. Disa rrjete të supermarketeve në Austri, në tri ditët e para kanë premtuar se do të dhurojnë falas maska për klientët e tyre. Ata që nuk i përmbahen kësaj rregulloreje, gjobiten me: 25 euro.

 

• Teste javore

Profesione e caktuara, të cilat kanë kontakte të drejtpërdrejta me njerëz të tjerë, obligohen të bëjnë teste javore ndaj koronavirusit. Këto përfshijnë, për shembull: Sektorin e shëndetësisë, tregtinë, sektorin e shërbimeve, kompanitë e transportit, mësuesit, mësuesit e çerdheve dhe punonjësit publikë.

 

Të gjitha rregulloret e tjera mbesin të njëjtat në fuqi deri së paku më 8 shkurt.

---