Shqiptarët udhëheqin Thunin drejt titullit historik

Matoshi dhe Imeri shkëlqejnë në sezonin sensacional, ndërsa Milaim Rama flet për suksesin e klubit dhe krenarinë shqiptare

Rikthimi i FC Thun në Superligën e Zvicrës po shndërrohet në histori suksesi falë kontributit të madh të futbollistëve shqiptarë. Pas 27 xhirove, Thuni kryeson me 64 pikë dhe është shumë pranë titullit të parë kampion në histori, transmeton albinfo.ch.

Në qendër të këtij rrugëtimi janë Valmir Matoshi dhe Kastriot Imeri. Matoshi, i zhvilluar te Thuni, ka katër gola dhe katër asistime këtë edicion, duke qenë titullar i padiskutueshëm. Ndërkohë, Imeri, i huazuar nga BSC Young Boys, ka rigjetur formën më të mirë, me gjashtë gola e pesë asistime në 21 paraqitje, duke u kthyer në lider të mesfushës dhe duke rritur gjasat për rikthim te Zvicra.

Për këtë sukses ka folur edhe legjenda e klubit, Milaim Rama, golashënuesi më i mirë në histori të Thunit. Ai thekson se kontributi i lojtarëve shqiptarë është vendimtar dhe se fitimi i titullit do të ishte historik për klubin me buxhet modest.

Rama, shqiptari i parë që luajti për Zvicrën, u shpreh optimist edhe për Kosovën, duke besuar se me paraqitje si ndaj Suedisë, përfaqësuesja jonë ka mundësi reale ta kalojë Sllovakinë në plejofin për Botërorin 2026. /Albinfo.ch

---