Shqiptarët përbëjnë numrin më të madh të azilkërkuesve në Francë

Kërkesat për azil janë rritur për 17 për qind, që është shifra më e lartë në 40 vjetët e fundit, sipas Pascal Brice, kreu i Zyrës franceze për refugjatë

Franca ka regjistruar numër rekord të kërkesave për azil gjatë vitit 2017, derisa shqiptarët janë të parët në listë, pavarësisht gjasave shumë të vogla për të marrë azilin, krahasuar me refugjatët që ikin nga zonat e përfshira nga lufta, si Siria apo Afganistani.

Kriza me imigrantë e refugjatë, tashmë më shumë se dy vjet, ka shkaktuar që kjo temë të bëhet debati kryesor politik në shumë shtete evropiane, përfshirë Francën.

Kërkesat për azil janë rritur për 17 për qind, që është shifra më e lartë në 40 vjetët e fundit, sipas Pascal Brice, kreu i Zyrës franceze për refugjatë.

Por, drejtori i organizatës joqeveritare “Frace Terre’s de Asile”, Pierre Henry, kishte rezerva për këtë shifër, duke thënë se nuk është e saktë. Sipas tij, rritja e kërkesave për azil në Francë nuk nënkupton kurrfarë invadimi. Dhe, ai pohon se, në fakt, janë 73 mijë kërkesa për azil, e jo 100 mijë.

Presidenti i Francës, Emmanuel Macron, i cili fitoi zgjedhjet në maj, ka premtuar se do të shkurtojë kohën sa i përket përgjigjes për azil, duke e bërë atë 2 muaj më së shumti, derisa Brice pohon se është 3 muaj mesatarisht.