Shqiptarët e Unia-s solidarizohen me grevistët e fabrikës së tubave

“Institucionet e Kosovës duhet ta zbatojnë vendimin e Gjykatës Kushtetuese dhe t’i plotësojnë kërkesat e drejta të këtyre punëtorëve”

Grupi i aktivistëve shqiptarë që vepron nüë kuadrin e sindikatës zvicerane Unia, mbështet kërkesat e grevistëve të Fabrikës së Tubave në Ferizaj. Këtë solidarizim ata e shprehin përmes një letre që i dërgojnë këshillit grevist në Kosovë.

Siç dihet, greva e filluar më 13.03.2014, e cila organizohet për shkak se Qeveria dhe AKP-ja nuk po e ekzekutojnë Aktgjykimin e Gjykatës Kushtetuese të Republikës së Kosovës respektivisht refuzojnë të paguajnë borxhin punonjësve të Fabrikës së Tubave të Ferizajt.

“Pjesëmarrësit e seminarit të radhës për aktivistët sindikalë shqiptarë në kuadër të sindikatës Unia, në të cilën aderojnë mbi 15’000 anëtarë me prejardhje shqiptare, unanimisht u pajtuan të shprehin solidaritetin e plotë sindikalist e shoqëror me punëtorët e Fabrikës së Tubave të Ferizajt, të cilët janë duke protestuar tani e disa ditë para objektit të Qeverisë së Kosovës protestat dhe greva e tyre janë të drejta dhe të bazuara edhe në ligj. Për më shumë vendimi i Gjykatës Kushtetuese e bën tërësisht të ligjshme ketë kërkesë”, thuhet në letrën e solidarizimit.

“Institucionet përgjegjëse të Kosovës duhet pa stërzgjatje dhe në mënyrë të përpiktë ta zbatojnë këtë vendim dhe t’i plotësojnë të gjitha kërkesat e drejta të këtyre punëtorëve”, vazhdon letra.

Në përmbyllje, aktivistët premtojnë që aksioni i solidarizimit të zgjerohet edhe më tutje. “Aktivistët shqiptarë dhe sekretarët e sindikatës Unia në ditët e ardhshme do të kërkojnë që jo vetëm sindikata Unia, por edhe sindikatat tjera, Unioni i Sindikatave të Zvicrës si dhe shoqatat tjera shqiptare, migrante e vendore të shprehin solidaritetin me punëtorët grevist të ish Fabrikës së Gypave në Ferizaj”, thuhet në fund të letrës, të nënshkruar nga Osman Osmani, sekretar për migracion në Sindikatën Unia.