Shqiptarët e Turqisë e duan shtetësinë e Kosovës

EPA/VALDRIN XHEMAJ

Teksa shumë shqiptarë që jetojnë në vendet perëndimore detyrohen të heqin dorë nga shtetësia e Kosovës, ka shqiptarë që duan të marrin shtetësinë në Kosovë.

Të tillë janë shumë shqiptarë që jetojnë në Turqi.

Serkan Aktashi jeton në Izmir të Turqisë, por me prejardhje është nga Drenica.

Ka disa herë që e viziton Kosovën, vendin e të parëve.

“Nuk e harrojmë kurrë Kosovën, se e kemi në gjak dhe në shpirt, vetëm fizikisht jemi duke jetuar në Turqi”, tha ai për RTK-në.

Serkani, si shumë shqiptarë të tjerë, kanë arritur ta mësojnë dhe të flasin gjuhën shqipe, por dëshira e tij është që ta fitojë shtetësinë e Kosovës.

Por, ka të tjerë që kanë hequr dorë nga shtetësia, për shkak të kushteve që përcaktojnë disa shtete të Shengenit.

Ka të tjerë që nuk kanë hequr dorë nga shtetësia e Kosovës, ngase u lejohet dyshtetësia në vendet ku jetojnë.

Çdo vit, në Departamentin për Shtetësi, Azil dhe Migracion në Ministrinë e Punëve të Brendshme, deri në 5 mijë persona heqin dorë nga shtetësia e Kosovës.