Shqipëria, në mesin e vendeve ku punohet me orar të zgjatur

Sipas orareve të zgjatura në punë dhe pagesave të ulëta, Shqipëria renditet mes vendeve të para në botë.

Organizata për Bashkëpunim dhe Zhvillim, OECD, ka nxjerrë të dhënat e fundit të tregut të punës, ku vendet me orarin më të zgjatur bëjnë 44 orë pune në javë. Ky është niveli i orëve të punës që realizohen në një javë në Shqipëri, ndonëse OECD nuk e ka në listën e saj, raportojnë mediat në Tiranë, përcjell albinfo.ch.

Sipas një vrojtimi të hershëm të Institutit të Statistikave, për një vit një person punon mesatarisht 2100 orë, ose rreth 44 orë në javë. Ndërkohë, orari zyrtar i punës, bazuar në Kodin e Punës, në Shqipëri është 40 orë javë.

Sipas të dhënave të Organizatës për Bashkëpunim e Zhvillim, Meksika, Kosta Rika dhe Turqia janë vendet ku bëhen më shumë orë pune në javë. Menjëherë pas tyre vjen Greqia me 42 orë në javë, ndërkohë, niveli mesatar i OECD-se ndalet në 36.8 orë pune në javë.
Sipas mediave të Tiranës, punët me oraret më të zgjatura në Shqipëri janë kryesisht në sektorin e tregtisë. Të frikësuar nga konkurrenca, e për shkak se mungon një rregullim orari nga institucionet, pjesa më e madhe e dyqaneve e bizneseve familjare qëndrojnë të hapura nga mëngjesi në darkë, por edhe në ditët zyrtare të pushimit.

Anketat e INSTAT-it tregojnë se një orë pune në Shqipëri arrin të ketë një vlerë mesatare prej 2.2 eurosh. Shifër kjo më e ulët se në Maqedoni, ku është 3.5 euro, e shumë më e ulët se në Evropë.