Shqipëria e rritë eksportin në Kosovë

Sipas raportit të Doganës, Shqipëria e zë vendin e parë sa i përket eksportit të materialeve ndërtimore në Kosovë

Brenda shtatë muajve të parë të këtij viti, Republika e Kosovës e ka importuar sasinë më të madhe të materialit ndërtimor nga Shqipëria, se sa nga vendet tjera. Madje Serbia, e cila ka qenë eksportues më i madh në Kosovë, sipas Doganave të Kosovës, ka pësuar rënie të dukshme të ndikimit në tregun kosovar.

Statistikat doganore të cilat ia ka publikuar e përtidshmja “Zëri”, gjatë periudhës janar – korrik 2012 në Kosovë kanë hyrë rreth 636 milionë kilogramë me material ndërtimor, ndërsa sasia e doganuar ka qenë rreth 89 milionë euro. Pjesa më e madhe e këtij importi vjen nga vendet e rajonit.

Sipas raportit të Doganës, Shqipëria e zë vendin e parë sa i përket eksportit të materialeve ndërtimore. Brenda këtij viti nga shteti amë, janë importuar 215 milionë kilogramë material ndërtimor, me vlerë doganore rreth 31 milionë euro.

Pas Shqipërisë prin Bosnja dhe Hercegovina me 49 milionë kilogramë eksport me rreth 25 milionë euro vlerë doganore. Sipas të dhënave që i jep “Zëri” në të njëjtën pozitë me Bosnjën qëndron edhe Maqedonia, ndërsa e fundit është Serbia me 160 milionë kilogramë të eksportuara me një bazë doganore rreth 12 milionë euro.

”Kosova varet nga importi, sepse kërkesat vijnë nga tregu . Sipas statistikave që kam, një pjesë e madhe e materialeve ndërtimore vjen nga Maqedonia, Shqipëria, Serbia dhe Turqia. Gjëja pozitive sa i përket importimit të materialeve ndërtimore është se konkurrenca e dikton edhe çmimin e tregut”, ka thënë Nebih Zariqi, kryetar i Shoqatës së Ndërtimtarëve të Kosovës.

Kosova, vendi i fundit që është përfshirë në tranzicion, ka mbetur mbrapa sa i përket teknologjisë së prodhimit të materialeve ndërtimore. Prandaj elementet bazë duhet t’i importoj nga vendet e rajonit, kryesisht hekurin dhe produktet e tij. I vetmi produkt që i plotëson deri diku nevojat, është çimentoja.