Shqipëria dëshiron t’ia rrëmbejë Zvicrës edhe Albian Ajetin

Pas Taulant Xhakës dhe Shkëlzen Gashit, shumë shpejt edhe një futbollist tjetër i Bazelit mund të vishet kuq e zi dhe të mbrojë ngjyrat e shqiponjës dykrerëshe

Shqipëria vazhdon përpjekjet e saj duke tentuar të rrëmbejë edhe talente të tjerë shqiptarë të futbollit nga Zvicra.

Pas Taulant Xhakës dhe Shkëlzen Gashit, shumë shpejt edhe një futbollist tjetër i Bazelit mund të vishet kuq e zi dhe të mbrojë ngjyrat e shqiponjës dykrerëshe.

Trajneri i kombëtares shqiptare, Gianni De Biasi, për gazetën “Blick” ka konfirmuar interesimin e tij për 18-vjeçarin Albian Ajeti. “Ai është një lojtar i ri, me cilësi të mira dhe me perspektivë. Ne jemi të interesuar për të dhe shpresojmë që ai do të luajë për kombëtaren tonë”, transmeton albinfo.ch.

Për ta bindur atë është duke punuar edhe vëllai i Albianit, Arlindi, i cili tashmë është i gatshëm të luajë për kombëtaren shqiptare.

Por, a mund të luajë Albiani që nga shtatori, kur janë edhe ndeshjet për kualifikime të kampionatit evropian? Përgjigjja është “jo”.

Sulmuesi fillimisht duhet të pajiset me dokumentet e nevojshme. “Nëse ai i jep me shpejtësi, atëherë mund të ftohet që të luajë në ndeshjet e tetorit”, thotë De Biasi.