Shqipëri: Zonat e mbrojtura, destinacion i 253 mijë turistëve vendas e të huaj

Zonat e mbrojtura në Shqipëri janë kthyer në të preferuarat e turistëve vendas dhe të huaj, pasi vendi ynë ka një turizëm gjithëvjetor, ku përveç bukurive bregdetare, ka një peizazh dhe klimë mjaft të mirë, e cila u ofron vizitorëve komoditetin e eksplorimit të vendeve të ndryshme.

Mbi 253 mijë turistë vendas e të huaj vizituan zonat e mbrojtura në maj 2019, duke shënuar thuajse 65 mijë vizitorë më shumë se në maj 2018.

“Zonat e mbrojtura, destinacione të padiskutueshme të turizmit gjithëvjetor natyror. Edhe këtë fundjavë të nxehtë turistë nga Belgjika, Gjermania, Franca, Hollanda, Kina, Austria përveç vizitorëve të shumtë vendas, zgjodhën të pushonin në atraksionet që ofrojnë zonat e mbrojtura, si Ujërat termale të Bënjës, Shpella e Akullit, Ujëvara e Sotirës, Kanionet e Osumit, Kepi i Rodonit e shumë destinacione të tjera në parqet kombëtare “Bredhi i Hotovës”, “Mali i Dajtit”, “Shebenik-Jabllanicë” e “Divjakë- Karavasta”, shprehet ministri i Turizmit dhe Mjedisit Blendi Klosi, shkruan atsh, përcjell albinfo.ch.

Në Shqipëri, zonat e mbrojtura zënë 20% të territorit ose e shprehur ndryshe, 1 në çdo 6 metra katrorë është zonë e mbrojtur.